لکھنؤ، اترپردیش: لکھنؤ کے سروجنی نگر علاقے میں ہفتہ کی شام تین منزلہ عمارت کے ملبے سے مزید تین لاشیں ملنے کے بعد مرنے والوں کی تعداد آٹھ ہو گئی ہے۔ حادثے میں زخمی ہونے والے 30 افراد مختلف اسپتالوں میں زیر علاج ہیں۔ حادثے کی تحقیقات کے لیے اتوار کو وزیر اعلیٰ کی ہدایت پر انکوائری کمیٹی بنائے جانے کا امکان ہے جس کے بعد تین منزلہ عمارت گرنے کی وجہ سامنے آئے گی اور ذمہ داروں کے خلاف کارروائی کی جائے گی۔ ڈویژنل کمشنر روشن جیکب کے مطابق انتظامیہ کی ترجیح ملبے تلے دبے لوگوں کو نکالنا ہے۔ راحت اور بچاؤ کا کام مکمل ہونے کے بعد ماہرین کی تحقیقاتی کمیٹی تشکیل دی جائے گی۔
پولس کمشنر امیت ورما نے اتوار کو نامہ نگاروں کو بتایا کہ ٹرانسپورٹ نگر میں ہونے والے اس حادثے میں اب تک آٹھ لوگوں کی موت ہو چکی ہے جبکہ 30 زخمی ہوئے ہیں اور مختلف ہسپتالوں میں زیر علاج ہیں۔ ان میں سے بیشتر کی حالت خطرے سے باہر ہے۔ ملبے میں پھنسے افراد کی تلاش کا کام فی الحال جاری ہے تاہم اب ملبے میں کسی کے پھنسے ہونے کا امکان نہ ہونے کے برابر ہے۔ انہوں نے کہا کہ حادثے کی وجہ جاننے کے لیے ماہرین کی ایک کمیٹی بنائی جائے گی اور وہی کمیٹی تحقیقات کے بعد حادثے کی وجہ کے بارے میں درست معلومات دے سکے گی۔
