نئی دہلی: مہاراشٹر میں ایک مرحلے میں 20 نومبر کو اور جھارکھنڈ میں 13 اور 20 نومبر کو دو مرحلوں میں اسمبلی انتخابات ہوں گے، جب کہ دونوں ریاستوں میں ووٹوں کی گنتی 23 نومبر کو ہوگی۔
پندرہ ریاستوں کی 47 اسمبلی سیٹوں اور کیرالہ کی وایناڈ پارلیمانی سیٹ پر 13 نومبر کو ضمنی انتخابات ہوں گے۔ ناندیڑ پارلیمانی سیٹ اور مہاراشٹر کی ایک اور اسمبلی سیٹ کے لیے 20 نومبر کو ضمنی انتخابات ہوں گے۔
چیف الیکشن کمشنر راجیو کمار نے منگل کو یہاں ایک پریس کانفرنس میں اسمبلی انتخابات کے شیڈول کا اعلان کرتے ہوئے رائے دہندوں بالخصوص شہری ووٹروں سے پرزور اپیل کی کہ وہ جمہوریت کے جشن میں جوش و خروش سے حصہ لیں۔ ان کے ساتھ الیکشن کمشنر گیانیش کمار اور سکھبیر سنگھ سندھو بھی تھے۔ اس کے ساتھ ہی ان دونوں ریاستوں میں ماڈل کوڈ آف کنڈکٹ نافذ ہو گیا ہے۔
