ممبئی، ریزرو بینک آف انڈیا (آر بی آئی) نے توقع کے مطابق بدھ کو ریپو ریٹ اور دیگر پالیسی شرحوں میں کوئی تبدیلی نہیں کی۔
آر بی آئی کے گورنر سنجے ملہوترا نے مرکزی بینک کی مانیٹری پالیسی کمیٹی (MPC) کی تین روزہ میٹنگ کے بعد بدھ کو کہا کہ اچھی مانسون اور آگے تہوار کے موسم کے ساتھ ساتھ پالیسی سازی کی سطح پر حمایت کی وجہ سے، مستقبل قریب میں ہندوستانی معیشت کے لیے اچھے اشارے ہیں۔ ترقی کو فروغ دینے کے لیے کمیٹی نے ریپو ریٹ کو 5.5 فیصد پر برقرار رکھنے کا فیصلہ کیا ہے۔ اس کے علاوہ، MPC نے پالیسی ریٹ کے حوالے سے اپنا موقف غیر جانبدار رکھا ہے، یعنی حالات کے مطابق اس میں کمی یا اضافہ کیا جا سکتا ہے۔
غور طلب ہے کہ ریپو ریٹ وہ شرح ہے جس پر آر بی آئی بینکوں کو قرض دیتا ہے۔ اسٹینڈنگ ڈپازٹ فیسیلٹی ریٹ 5.25 فیصد اور مارجنل سٹینڈنگ فیسیلٹی ریٹ 5.75 فیصد پر مستحکم رکھا گیا ہے۔
مسٹر ملہوترا نے کہا کہ MPC نے رواں مالی سال 2025-26 کے لیے شرح نمو کی پیشن گوئی کو 6.5 فیصد پر مستحکم رکھنے کا بھی فیصلہ کیا ہے، جبکہ صارفین کی قیمت پر مبنی خوردہ افراط زر کی پیشن گوئی 3.7 فیصد سے کم کر کے 3.1 فیصد کر دی گئی ہے۔
