تہران: ایران کے اسلامی انقلابی گارڈ کور (IRGC) نے پیر کے روز دعویٰ کیا ہے کہ اس نے اسرائیلی حملوں کے جواب میں 'آپریشن نصر' (فتح) کے نام سے ایک بڑے فوجی آپریشن کا آغاز کرتے ہوئے اسرائیل کے نیواتیم اور تل نوف فضائی اڈوں کو نشانہ بنایا ہے۔ آئی آر جی سی نے ایک بیان میں کہا ہے کہ اس کی ایرو اسپیس فورس نے یہ کارروائی ایران کے مختلف حصوں میں واقع متعدد ریڈار سائٹس پر اسرائیل کے میزائل حملوں کے جواب میں کی۔
بیان کے مطابق، یہ کارروائی اسرائیلی فوجی سرگرمیوں کا براہ راست جواب تھا اور ایران کی تیز رفتار ردعمل کی صلاحیت اور ہدف کے انتخاب کی وسعت کا ثبوت ہے۔ آئی آر جی سی نے کہا کہ اس کے تمام جنگی اور آپریشنل یونٹس ہائی الرٹ پر ہیں اور اگر علاقائی کشیدگی مزید بڑھی تو مزید کارروائی کے لیے تیار ہیں۔