گیممبئی،  معروف اداکارہ وَحیدہ رحمان فلم ساز انوراگ سنہا اور سدھیر مشرا کی آنے والی فلم میں مہاتما گاندھی کی والدہ پُتلی بائی کا کردار ادا کریں گی۔فلم میں منوج باجپئی مہاتما گاندھی کا کردار ادا کر رہے ہیں، جبکہ سوربھ شکلا بھی اہم کردار میں نظر آئیں گے۔
یہ فلم مہاتما گاندھی کی زندگی کے کم زیر بحث 21 دنوں کی کہانی پر مبنی ہے۔
سدھیر مشرا کی ہدایت کاری میں بننے والی اس فلم کو انوراگ سنہا اور نریندر ہیراؤت اے بنارس میڈیا ورکس کے بینر تلے پروڈیوس کر رہے ہیں۔فلم کو این ایچ اسٹوڈیوز پیش کر رہا ہے۔
وَحیدہ رحمان کی موجودگی سے فلم میں جذباتی گہرائی شامل ہونے کی امید ہے۔
سدھیر مشرا نے کہا کہ وَحیدہ رحمان کا اس پروجیکٹ کا حصہ بننا ان کے لیے انتہائی خاص اور باعثِ اعزاز ہے۔
انہوں نے کہا کہ ’پیاسا‘، ’صاحب بی بی اور غلام‘، ’کاغذ کے پھول‘ اور ’گائیڈ‘ جیسی فلموں سے ان کا گہرا تعلق رہا ہے اور انہیں یقین نہیں ہوتا کہ ایسی تاریخی فلموں کی اداکارہ اب ان کی ہدایت کاری میں بننے والی فلم کا حصہ بننے جا رہی ہیں۔
انوراگ سنہا نے کہا کہ وَحیدہ رحمان کے ساتھ فلم اور خاص طور پر اس پروجیکٹ پر بات چیت کرنا ان کے لیے باعثِ اعزاز رہا۔انہوں نے خوشی کا اظہار کیا کہ سدھیر مشرا اور فلم کی کہانی وَحیدہ رحمان کو دوبارہ فلم کے سیٹ پر لانے میں کامیاب رہے۔