نئی دہلی: اراکین نے پیر کو لوک سبھا میں دہلی کے راجندر نگر میں کوچنگ حادثے کا معاملہ اٹھایا، اس معاملے کی تفصیلی تحقیقات اور قصورواروں کے خلاف سخت کارروائی کا مطالبہ کیا۔ بھارتیہ جنتا پارٹی (بی جے پی) کے بنسوری سوراج نے زیرو آور شروع ہوتے ہی کوچنگ میں ایک حادثے میں دو طالبات اور ایک لڑکے کی موت کا معاملہ اٹھاتے ہوئے کہا کہ دہلی کے راجندر نگر میں ایک دل دہلا دینے والا واقعہ پیش آیا جس میں تین بچے جان کی بازی ہار گئے۔ یہ بچے اپنا مستقبل روشن کرنے آئے تھے لیکن دہلی حکومت کی لاپرواہی کی وجہ سے ان کی جان چلی گئی۔ انہوں نے کہا کہ دہلی میں ایک دہائی سے عام آدمی پارٹی کی حکومت ہے لیکن حکومت دہلی کے لوگوں کے لیے کوئی کام نہیں کر رہی ہے۔ دہلی میونسپل کارپوریشن میں بھی پچھلے دو سالوں سے عام آدمی پارٹی کی حکومت ہے۔ انہوں نے حکومت سے معاملے کی تحقیقات کا مطالبہ کیا۔
کانگریس کے ششی تھرور نے کہا کہ جس طرح کا واقعہ ہوا ہے وہ بہت سنگین ہے۔ انہوں نے کہا کہ یہاں قوانین کی سنگین غفلت ہے۔ اس معاملے کی انکوائری ہونی چاہیے تاکہ آئندہ ایسا واقعہ دوبارہ نہ ہو۔ آزاد رکن پارلیمنٹ راجیش رنجن عرف پپو یادو نے کہا کہ مسلسل کوچنگ کے معیارات اور سیکورٹی انتظامات کی کمی سنگین ہے سماج وادی پارٹی کے اکھلیش یادو نے کہا کہ حکومت کو بتانا چاہئے کہ اس واقعہ کے ذمہ داروں کے خلاف کیا کارروائی کی جا رہی ہے۔ انہوں نے کہا کہ یہ صرف ایک عمارت کا معاملہ نہیں ہے۔ ہم اتر پردیش سے دیکھ رہے ہیں کہ جب وہاں غیر قانونی عمارتیں بنتی ہیں تو بلڈوزر کا استعمال کیا جاتا ہے۔ کیا حکومت یہاں بھی بلڈوزر استعمال کرے گی؟ کانگریس کے ہیبی ایڈن نے کہا کہ راجندر نگر کا واقعہ انتہائی افسوس ناک ہے۔ اس معاملے میں جو بھی ذمہ دار ہے اس کے خلاف سخت کارروائی کی جائے تاکہ آئندہ ایسا واقعہ دوبارہ نہ ہو۔
