نئی دہلی، الیکشن کمیشن نے راجیہ سبھا کی 6 خالی نشستوں کے لیے 20 دسمبر کو ضمنی انتخابات کرانے کا اعلان کیا ہے اور اس کے لیے نوٹیفکیشن 3 دسمبر کو جاری کیا جائے گا۔
منگل کو کمیشن کی ایک پریس ریلیز کے مطابق، آندھرا پردیش سے تین اور اوڈیشہ، مغربی بنگال اور ہریانہ سے ایک ایک سیٹ کے لیے انتخابات ہونے ہیں۔
الیکشن کمیشن کے اعلان کردہ پروگرام کے مطابق ان چھ نشستوں پر ضمنی انتخابات کا نوٹیفکیشن 3 دسمبر کو جاری کیا جائے گا اور اسی کے ساتھ کاغذات نامزدگی جمع کرانے کا عمل شروع ہو جائے گا۔
کاغذات نامزدگی 10 دسمبر تک داخل کیے جاسکتے ہیں۔ کاغذات نامزدگی کی جانچ پڑتال 11 دسمبر کو ہو گی اور 13 دسمبر تک واپس لیے جا سکیں گے۔
ضرورت پڑنے پر 20 دسمبر کو صبح 9 بجے سے شام 4 بجے تک ووٹنگ ہوگی۔ ووٹوں کی گنتی اسی دن شام 5 بجے ہوگی۔
ضمنی انتخاب کا تمام عمل 24 دسمبر تک مکمل ہو جائے گا۔
