ممبئی: بھارتیہ جنتا پارٹی (بی جے پی) کی کونسلر ریتو تاوڑے بدھ کو ممبئی کی میئر کے طور پر بلا مقابلہ منتخب ہوگئیں، جس سے برہان ممبئی میونسپل کارپوریشن (بی ایم سی) میں شیو سینا (یو بی ٹی) کے 25 سالہ تسلط کا خاتمہ ہوگیا۔
محترمہ تاوڑے 44 سالوں میں اس عہدے پر فائز ہونے والی دوسری بی جے پی کونسلر ہیں۔ وہ شہری مسائل پر اپنے واضح موقف اور مراٹھی شناخت کی وکالت کے لیے جانی جاتی ہیں۔ اس بار میئر کا عہدہ خاتون کے لیے مخصوص تھا۔ اہم اپوزیشن پارٹی شیو سینا (ادھو ٹھاکرے) نے ان کے خلاف امیدوار کھڑا نہیں کیا۔
یہ پہلا موقع ہوگا جب بی جے پی کی کوئی خاتون ممبئی کے بی ایم سی کے میئر کے عہدے پر فائز ہوگی۔ محترمہ تاوڑے کی تقرری سے ممبئی کی سیاست میں ایک نئی سمت آنے کی امید ہے۔ دریں اثنا نائب وزیر اعلیٰ ایکناتھ شندے کی قیادت میں شیو سینا کے سنجے شنکر گاڈی ڈپٹی میئر کے طور پر بلا مقابلہ منتخب ہو گئے۔
غور طلب ہے کہ 15 جنوری کو ہوئے بی ایم سی انتخابات میں بی جے پی نے 89 اور شندے کی شیو سینا نے 29 سیٹیں جیتی ہیں۔ بی ایم سی کی کل 227 سیٹیں ہیں۔
