بھوپال۔ مدھیہ پردیش کی راجدھانی بھوپال میں بی جے پی کے ’’جمہوریت بچاؤ، انارکی ہٹاؤ‘‘ مارچ کے دوران وزیر اعلیٰ موہن یادو کی زبان پھسلنا اب سیاسی بحث کا موضوع بن گیا ہے۔ اپنی تقریر کے دوران وزیر اعلیٰ نے غلطی سے کہا ’’ڈاؤن ود جے پی نڈا‘‘۔ تاہم، انہوں نے جلدی سے اپنی غلطی کو درست کیا اور نعرہ بلند کیا "جے پی نڈا زندہ باد"۔ اس واقعہ کو لے کر اپوزیشن لیڈروں نے اب بی جے پی اور وزیر اعلیٰ کو نشانہ بنانا شروع کر دیا ہے۔
سماج وادی پارٹی کے قومی صدر اور اتر پردیش کے سابق وزیر اعلی اکھلیش یادو نے اس واقعہ پر تنقید کی ہے۔ سوشل میڈیا پلیٹ فارم ایکس پر پوسٹ کرتے ہوئے انہوں نے لکھا کہ "اس کے پیچھے والا شخص اپنے سامنے والے سے زیادہ سمجھدار ہے، ردعمل کو بہت غور سے دیکھنا چاہیے، آج اس کے منہ سے دل کی باتیں نکل گئیں۔" وزیر اعلی کے پیچھے کھڑے سیکورٹی گارڈ کے ردعمل کی وجہ سے اکھلیش یادو کے اس تبصرہ کی بھی بحث ہو رہی ہے۔
