پاک فوج کا بھارتی لڑاکا طیارہ مار گرانے کا دعویٰ جھوٹا اور بے بنیاد ہے، حکومت

 

نئی دہلی: ہندوستان نے پاکستان کے حمایت یافتہ متعدد سوشل میڈیا اکاؤنٹس کے ذریعہ ہندوستانی فضائیہ کے لڑاکا طیارے کو مار گرائے جانے کے دعوے کو جھوٹا قرار دیتے ہوئے کہا ہے کہ یہ گمراہ کن اور بے بنیاد پروپیگنڈہ ہے اور کوئی ہندوستانی طیارہ مار گرایا نہیں گیا ہے۔
اطلاعات و نشریات کی وزارت کے پریس انفارمیشن بیورو (PIB) نے منگل کو سوشل میڈیا پلیٹ فارم X پر کہا کہ پاکستان کے حامی کئی سوشل میڈیا اکاؤنٹس جھوٹا دعویٰ کر رہے ہیں کہ پاکستان نے جموں و کشمیر کے پونچھ سیکٹر میں لائن آف کنٹرول کے قریب ہندوستان کا رافیل لڑاکا طیارہ مار گرایا ہے۔
پریس انفارمیشن بیورو نے کہا ہے کہ پاکستان نے ہندوستان کا کوئی لڑاکا طیارہ مار گرایا نہیں ہے۔ پاکستان کے حمایت یافتہ سوشل میڈیا اکاؤنٹس پر شیئر کی جانے والی ویڈیو سکھوئی 30 لڑاکا طیارے کے حادثے کی ہے جو جون 2024 میں مہاراشٹر میں گر کر تباہ ہو گیا تھا۔
پریس انفارمیشن بیورو نے لوگوں کو مشورہ دیا ہے کہ وہ ایسے غیر تصدیق شدہ دعووں پر مشتمل پوسٹس شیئر کرتے وقت احتیاط برتیں۔
قابل ذکر ہے کہ پہلگام دہشت گردانہ حملے کے بعد دونوں ممالک کے درمیان پیدا ہونے والے کشیدہ ماحول میں لوگوں کو گمراہ کرنے کے لیے پاکستان اور اس کے حمایت یافتہ سوشل میڈیا اکاؤنٹس پر آئے روز ایسے جھوٹے دعوے کیے جا رہے ہیں۔ بھارت نے پیر کو 16 پاکستانی یوٹیوب چینلز پر پابندی لگا دی جو اس طرح کے پروپیگنڈے میں ملوث تھے۔