نئی دہلی، سپریم کورٹ کے تین نئے تعینات ہونے والے ججوں نے جمعہ کو عہدے اور رازداری کا حلف لیا۔
چیف جسٹس بی آر گاوائی نے سپریم کورٹ کمپلیکس کے آڈیٹوریم میں منعقدہ ایک تقریب میں جسٹس این وی انجاریا، جسٹس وجے بشنوئی اور جسٹس اے ایس چندورکر کو سپریم کورٹ کے ججوں کی حیثیت سے حلف دلایا۔ ان کی حلف برداری کے ساتھ ہی سپریم کورٹ کے لیے مقرر کردہ کل 34 ججوں کی تعداد مکمل ہو گئی ہے۔
حلف برداری کی تقریب میں عدالت عظمیٰ کے دیگر ججوں کے علاوہ کئی سینئر وکلاء اور معززین بھی موجود تھے۔
اس ماہ سپریم کورٹ میں ججوں کے تین عہدے اس وقت کے سپریم کورٹ کے چیف جسٹس سنجیو کھنہ اور جسٹس بیلا ایم ترویدی اور جسٹس اے ایس اوکا کے ریٹائر ہونے کے بعد خالی ہوگئے تھے۔
جسٹس گوائی کی سربراہی میں سپریم کورٹ کے کالجیم نے 26 مئی 2025 کو مختلف ہائی کورٹس کے تین چیف جسٹسوں کو سپریم کورٹ میں جج کے عہدے پر ترقی دینے کی سفارش کی تھی۔
صدر دروپدی مرمو کی منظوری کے بعد، مرکزی حکومت نے جمعرات کو ایک نوٹیفکیشن جاری کیا جس میں جسٹس انجاریا، جسٹس بشنوئی اور جسٹس چندورکر کو سپریم کورٹ کا جج مقرر کیا گیا۔
سپریم کورٹ کے جج کے طور پر حلف لینے سے پہلے جسٹس انجاریا کرناٹک ہائی کورٹ کے چیف جسٹس تھے، جب کہ جسٹس بشنوئی گوہاٹی ہائی کورٹ کے چیف جسٹس تھے اور جسٹس چندورکر بمبئی ہائی کورٹ کے چیف جسٹس تھے۔
