نئی دہلی، الیکشن کمیشن نے کہا ہے کہ تمام سیاسی جماعتوں کی بھرپور شرکت کے ساتھ بہار میں ہر ووٹر کی اہلیت کی تصدیق کے لیے خصوصی نظر ثانی کا کامیابی سے آغاز کر دیا گیا ہے۔
الیکشن کمیشن نے آج کہا کہ بہار اسمبلی انتخابات میں 98 ہزار سے زیادہ بوتھ لیول آفیسرز (BLOs) کام کریں گے، جن میں سے 77,895 پہلے ہی تعینات ہیں اور تقریباً 20,603 مزید BLOs نئے پولنگ اسٹیشنوں کے لیے مقرر کیے جا رہے ہیں۔ اس کے ساتھ ہی کمیشن کے ساتھ رجسٹرڈ سیاسی جماعتوں نے 1,54,977 بوتھ لیول ایجنٹس-بی ایل اے کو بھی تعینات کیا ہے اور ان کے ذریعہ مزید تقرریاں کی جا سکتی ہیں۔
بہار میں موجودہ 7,89,69,844 ووٹروں کے لئے نئے گنتی فارموں کی پرنٹنگ اور گھر گھر تقسیم کا کام ریاست کے تمام 243 اسمبلی حلقوں میں شروع ہو گیا ہے۔ آن لائن گنتی کے نئے فارموں کو بھرنا کامیابی سے شروع ہو چکا ہے۔ موجودہ 7,89,69,844 ووٹروں میں سے، 4.96 کروڑ ووٹرز، جن کے نام 01.01.2003 تک انتخابی فہرستوں کی آخری گہری نظرثانی میں پہلے ہی شامل ہیں، صرف تصدیق کرنے، گنتی کے فارم کو پُر کرنے اور جمع کروانے کی ضرورت ہے۔
کمیشن نے بتایا کہ تمام ڈویژنل کمشنرز اور ڈسٹرکٹ مجسٹریٹس خصوصی نظر ثانی کے دوران تمام BLOs کو کل وقتی ڈیوٹی پر تعینات کر رہے ہیں۔ بہار کے 5,74,07,022 رجسٹرڈ موبائل نمبروں پر بھی ایس ایم ایس بھیجے جا رہے ہیں۔ نظرثانی سے متعلق سرگرمیاں طے شدہ پروگرام کے مطابق اچھی طرح سے آگے بڑھ رہی ہیں۔
