ممبئی، بالی ووڈ اسٹار اور فلمساز عامر خان نے اپنی نئی فلم ستارے زمین پر کو یوٹیوب موویز آن ڈیمانڈ پر ریلیز کرنے کا فیصلہ کیا ہے، تاکہ فلم سستے اور آسان طریقے سے دنیا کے کونے کونے تک پہنچ سکے۔
عامر خان نے اعلان کیا کہ ان کی سپر ہٹ فلم ستارے زمین پر اب یکم اگست 2025 سے دنیا بھر میں یوٹیوب پر ریلیز کی جائے گی۔بھارت میں یہ فلم 100 روپے میں دستیاب ہوگی جب کہ امریکا، کینیڈا، برطانیہ، آسٹریلیا، جرمنی، انڈونیشیا، فلپائن، سنگاپور اور اسپین سمیت 38 ممالک میں یہ مقامی پرائیویٹ کے ساتھ دستیاب ہوگی۔
عامر خان نے کہا کہ میں گزشتہ 15 سال سے ان لوگوں تک پہنچنے کی کوشش کر رہا تھا جو تھیٹر نہیں جا سکتے، یا جو کسی وجہ سے تھیٹر نہیں جا پا رہے ہیں۔ اب آخر کار وہ وقت آ گیا ہے جب سب کچھ ایک ساتھ فٹ ہو جائے گا۔ ہماری حکومت نے UPI شروع کیا اور اب ہندوستان الیکٹرانک ادائیگیوں میں دنیا میں نمبر 1 ہے۔ ہندوستان میں انٹرنیٹ تک رسائی بھی تیزی سے بڑھی ہے اور ہر روز بڑھ رہی ہے۔ نیز، YouTube تقریباً ہر ڈیوائس میں دستیاب ہے۔ اب ہم ہندوستان کے ایک بڑے حصے اور دنیا کے بہت سے لوگوں تک فلمیں پہنچا سکتے ہیں۔
عامر خان نے کہا کہ میرا خواب ہے کہ سنیما سب تک پہنچے، وہ بھی مناسب اور سستی قیمت پر۔ میں چاہتا ہوں کہ لوگ جب چاہیں، جہاں چاہیں سنیما دیکھیں۔ اگر یہ طریقہ کامیاب ہو جاتا ہے تو تخلیقی لوگ سرحدوں یا دیگر رکاوٹوں کی فکر کیے بغیر مختلف کہانیاں سنا سکیں گے۔ یہ نئے فنکاروں اور فلم انڈسٹری میں آنے والے لوگوں کے لیے بھی بہترین موقع ہوگا۔ اگر یہ آئیڈیا کام کرتا ہے تو یہ سب کے لیے فائدہ مند ثابت ہوگا۔
آر ایس پرسنا کی ہدایت کاری اور دیویا ندھی شرما کی تحریر کردہ، ستارے زمین پر میں عامر خان، جینیلیا ڈی سوزا نے مرکزی کردار ادا کیے ہیں اور دس نئے اداکاروں کو بھی متعارف کرایا ہے۔
