۔
نئی دہلی، مرکزی زراعت اور کسانوں کی بہبود اور دیہی ترقی کے وزیر شیوراج سنگھ چوہان پیر کو راجستھان کے جھنجھنو میں منعقدہ ایک قومی پروگرام میں پردھان منتری فصل بیمہ یوجنا کے تحت 30 لاکھ کسانوں کو ان کے دعووں پر منظور شدہ رقم براہ راست ان کے کھاتوں میں ادا کریں گے۔
اس اسکیم میں پہلی بار کسانوں کو الیکٹرانک ذرائع سے براہ راست ان کے کھاتوں میں ادائیگی کی جارہی ہے۔ اس مقام سے تقریباً 3200 کروڑ روپے ادا کیے جائیں گے۔
سرکاری معلومات کے مطابق راجستھان کے وزیر اعلی بھجن لال شرما اس پروگرام میں مہمان خصوصی ہوں گے۔
اس تقریب میں زراعت اور کسانوں کی بہبود کے مرکزی وزیر مملکت بھاگیرتھ چودھری اور راجستھان کے وزیر زراعت ڈاکٹر کروری لال مینا بھی مہمان خصوصی کے طور پر موجود ہوں گے۔ مقامی عوامی نمائندے، کسان لیڈر اور وزارت اور ریاستی حکومت کے سینئر افسران بھی اس پروگرام میں شرکت کریں گے۔ یہ پروگرام پیر کو دوپہر 12 بجے جھنجھنو ہوائی پٹی پر منعقد کیا جائے گا، جس میں جھنجھنو سمیت مختلف اضلاع کے ساتھ ساتھ سیکر، جے پور، کوٹ پٹلی-بہادر گڑھ کے کسانوں کی بڑی تعداد شرکت کرے گی، جبکہ ملک بھر کی مختلف ریاستوں سے لاکھوں کسان بھی ورچوئل میڈیم کے ذریعے اس تقریب میں شامل ہوں گے۔
