نئی دہلی: مرکزی وزیر خزانہ نرملا سیتا رمن نے پیر کو کہا کہ سونے کی قیمتوں میں موجودہ اضافہ بنیادی طور پر دنیا بھر میں مرکزی بینکوں کے ذریعہ سونے اور چاندی کی بڑھتی ہوئی خریداری کی وجہ سے ہے۔
محترمہ سیتا رمن نے کہا کہ ملک میں سونے کی سرمایہ کاری اور کھپت کی مانگ کو دیکھتے ہوئے ایسا نہیں لگتا کہ صورتحال تشویش کی سطح پر ہے، پھر بھی ریزرو بینک آف انڈیا (آر بی آئی) مارکیٹ پر گہری نظر رکھے ہوئے ہے۔ محترمہ سیتا رمن آر بی آئی کے سنٹرل بورڈ آف ڈائریکٹرز کی پوسٹ بجٹ میٹنگ میں شرکت کے بعد نامہ نگاروں سے خطاب کر رہی تھیں۔
وزیر خزانہ نے کہا، "ان دنوں، زیادہ تر ممالک، خاص طور پر ان کے مرکزی بینک، سونا اور چاندی خرید کر ذخیرہ کر رہے ہیں۔ جب آپ ہندوستانی صارف بازار کی بات کرتے ہیں، تو یہ ایک رجحان ہے۔" ہر مرکزی بینک کے پاس کچھ نہ کچھ ذخائر ہوتے ہیں لیکن حالیہ دنوں میں آپ نے دیکھا ہوگا کہ کئی دوسرے ممالک کے مرکزی بینک بھی سونا خرید رہے ہیں۔ انہوں نے کہا، 'قیمتوں میں اضافہ بنیادی طور پر مرکزی بینکوں کی جانب سے سونا خریدنے اور ذخیرہ کرنے کی وجہ سے ہے۔'
