بنگلورو: کرناٹک کی راجدھانی بنگلورو میں اس سال اب تک کی سب سے زیادہ بارش ہونے کے بعد کئی علاقوں میں پانی جمع ہونے کی وجہ سے زندگی ٹھپ ہو کر رہ گئی ہے۔ سائی لے آؤٹ بارش سے سب سے زیادہ متاثر ہونے والے علاقوں میں سے ایک ہے۔
مقامی باشندوں نے آج یہاں بتایا کہ گزشتہ 24 گھنٹوں میں تقریباً 40 ملی میٹر بارش کے بعد مکانات پانی میں ڈوب گئے، سامان بھیگ گیا اور گاڑیاں جزوی طور پر ڈوب گئیں۔
دریں اثنا، ہندوستان کے محکمہ موسمیات (آئی ایم ڈی) کے مطابق، بنگلورو میں آج صبح تک 10.3 ملی میٹر بارش ریکارڈ کی گئی اور کئی علاقوں میں ہوا کی رفتار 50 کلومیٹر فی گھنٹہ تک پہنچ گئی۔ محکمہ کے مطابق 23 مئی کو ریاست میں شدید بارش کے امکانات ہیں اور آنے والا ہفتہ بھی مرطوب اور ہنگامہ خیز رہ سکتا ہے۔
آئی ایم ڈی کے مطابق، ریاست کے 22 دیگر اضلاع کے ساتھ بنگلورو کے لیے یلو الرٹ جاری کیا گیا ہے، جس میں 22 مئی تک مسلسل بارش اور گرج چمک کے ساتھ انتباہ جاری کیا گیا ہے۔ شہر میں 25 مئی تک ابر آلود رہنے کی توقع ہے اور دوپہر میں کچھ مقامات پر گرج چمک کے ساتھ طوفان کا امکان ہے اور زیادہ سے زیادہ درجہ حرارت 27 ڈگری سیلسیس اور 2 ڈگری سیلسیس کے درمیان رہنے کا امکان ہے۔
دریں اثنا، بنگلورو کے نشیبی علاقوں میں کئی خاندانوں کو سیلاب کی وجہ سے اپنے گھر خالی کرنے پڑے۔ لوگوں نے اس کی وجہ نالوں کی بندش اور شہری خدمات کی بے حسی کو قرار دیا۔ مکینوں نے دعویٰ کیا کہ حکام کو بار بار کی شکایات پر کان نہیں دھرے گئے۔
