ممبئی، بالی ووڈ سپر اسٹار امیتابھ بچن اور اداکارہ جیا بھادوری کی شادی کو آج 52 سال مکمل ہوگئے۔ امیتابھ بچن اور جیا بھادوری کی شادی 03 جون 1973 کو ممبئی میں ہوئی۔
امیتابھ اور جیا آج اپنی شادی کی 52 ویں سالگرہ منا رہے ہیں۔ امیتابھ بچن اور جیا بچن کی جوڑی بالی ووڈ میں کافی ہٹ رہی ہے۔ امیتابھ اور جیا نے کئی کامیاب فلموں میں ایک ساتھ کام کیا ہے جن میں زنجیر، ابھیمان، چپکے چپکے، شعلے، سلسلہ، ملی، کبھی خوشی کبھی غم شامل ہیں۔ امیتابھ بچن اور جیا بچن ہندی سنیما کی سب سے زیادہ پسند کی جانے والی جوڑیوں میں سے ایک ہیں۔ دونوں کی پرانی تصویریں اکثر سوشل میڈیا پر وائرل ہوتی رہتی ہیں۔
امیتابھ اور جیا کی پہلی ملاقات فلم اینڈ ٹیلی ویژن انسٹی ٹیوٹ آف انڈیا میں ہوئی تھی۔ ستر کی دہائی میں امیتابھ بچن اور جیا بھادوری دونوں نے 'بنسی برجو' اور 'ایک نظر' جیسی فلموں میں ایک ساتھ کام کیا۔ یہاں سے دونوں کے درمیان قربتیں بڑھنے لگیں۔ سال 1973 میں ریلیز ہونے والی فلم 'زنجیر' کی کامیابی کے بعد امیتابھ نے اپنے دوستوں کے ساتھ لندن جانے کا منصوبہ بنایا۔ امیتابھ اور جیا دونوں چھٹیاں منانے لندن جانا چاہتے تھے۔ امیتابھ بچن کے والد ہری ونش رائے بچن کو یہ بات پسند نہیں آئی۔ انہوں نے امیتابھ سے کہا کہ اگر آپ چھٹی منانے جانا چاہتے ہیں تو پہلے شادی کر لیں پھر جائیں۔ اس کے بعد امیتابھ اور جیا کی شادی 03 جون 1973 کو ہوئی، کہا جاتا ہے کہ اس شادی میں صرف پانچ باراتیوں نے شرکت کی۔ آج امیتابھ اور جیا اپنے پورے خاندان کے ساتھ خوشگوار زندگی گزار رہے ہیں۔
