نئی دہلی، ملک میں گزشتہ 24 گھنٹوں کے دوران کورونا انفیکشن کی وجہ سے مزید نو مریضوں کی موت کے ساتھ ہی اس وائرس سے ہونے والی اموات کی کل تعداد بڑھ کر 87 ہو گئی ہے اور 269 ایکٹیو کیسز کے اضافے کے ساتھ ہی کل ایکٹو کیسز کی تعداد 7400 ہو گئی ہے۔ اس سے قبل جمعہ کو فعال کورونا کیسز کی کل تعداد 7131 تھی۔
مرکزی وزارت صحت اور خاندانی بہبود کی طرف سے آج جاری کردہ اعداد و شمار کے مطابق، گزشتہ 24 گھنٹوں میں مہاراشٹر میں کورونا انفیکشن کی وجہ سے چار، کیرالہ میں تین اور راجستھان اور تمل ناڈو میں ایک ایک مریض کی موت ہوئی ہے۔
قومی دارالحکومت، مہاراشٹر، گجرات، کیرالہ اور مغربی بنگال جیسی ریاستوں میں سب سے زیادہ کیس رپورٹ ہو رہے ہیں۔ 22 مئی کو ملک میں کورونا کے صرف 257 ایکٹو کیسز تھے جو آج بڑھ کر 7400 ہو گئے ہیں۔ وزارت صحت کے اعداد و شمار کے مطابق اس عرصے کے دوران 11967 مریض کورونا انفیکشن سے صحت یاب ہوئے ہیں۔
گزشتہ 24 گھنٹوں کے دوران، گجرات (79)، کرناٹک (132)، کیرالہ (54) اور مدھیہ پردیش (20) سے کورونا انفیکشن کے سب سے زیادہ فعال کیسز سامنے آئے ہیں جب کہ کیسز کی تعداد دہلی میں 42، آندھرا پردیش میں 15 اور مہاراشٹر میں 16 کم ہوئی ہے۔
