مالے/نئی دہلی، مالدیپ کے اپنے دو روزہ دورے کے آخری دن وزیر اعظم نریندر مودی نے ہفتہ کو یہاں مالے میں نائب صدر حسین محمد لطیف، سابق صدر محمد نشید اور پارلیمنٹ کے اسپیکر عبدالرحیم عبداللہ سے ملاقات کی اور مختلف موضوعات پر تبادلہ خیال کیا۔
نائب صدر سے ملاقات کے بعد مسٹر مودی نے کہا کہ اس دوران بات چیت ہندوستان-مالدیپ دوستی کے اہم ستونوں پر مرکوز رہی اور امید ہے کہ آنے والے سالوں میں دونوں ممالک کے درمیان شراکت داری مزید مضبوط ہوگی۔
انہوں نے کہا، "نائب صدر حسین محمد لطیف کے ساتھ میری بہت اچھی ملاقات رہی۔ ہماری بات چیت ہندوستان مالدیپ دوستی کے اہم ستونوں پر مرکوز رہی۔ ہمارے ممالک بنیادی ڈھانچے، ٹیکنالوجی، موسمیاتی تبدیلی، توانائی وغیرہ کے شعبوں میں مل کر کام کرتے رہتے ہیں۔ یہ ہمارے لوگوں کے لیے بہت فائدہ مند ہے۔ ہمیں امید ہے کہ آنے والے سالوں میں اس شراکت داری کو مزید گہرا کیا جائے گا۔" وزیر اعظم نے مسٹر نشید کو ہندوستان مالدیپ دوستی کا ایک مضبوط حامی بتایا اور کہا کہ مالدیپ ہمیشہ ہندوستان کی پڑوسی اول پالیسی کا ایک اہم ستون رہے گا۔ انہوں نے کہا، "مالدیپ کے سابق صدر جناب محمد نشید سے ملاقات کی، وہ ہمیشہ ہندوستان-مالدیپ دوستی کے مضبوط حامی رہے ہیں۔ مالدیپ ہمیشہ ہماری 'پڑوسی اولین' پالیسی اور سمندری نقطہ نظر کا ایک اہم ستون رہے گا۔ ہندوستان صلاحیت کی تعمیر اور ترقیاتی تعاون کے ذریعے مالدیپ کی حمایت جاری رکھے گا۔"
