نئی دہلی - وزیر اعظم نریندر مودی نے دیوالی کے موقع پر مبارکباد اور نیک تمناؤں کے لیے امریکی صدر ڈونلڈ ٹرمپ کا شکریہ ادا کیا اور خواہش ظاہر کی کہ دونوں عظیم جمہوریتیں دنیا کو امید کی کرن دکھاتی رہیں اور دہشت گردی کے خلاف اس کی تمام شکلوں میں متحد رہیں۔ قبل ازیں منگل کو مسٹر ٹرمپ نے وائٹ ہاؤس میں دیوالی کا جشن منایا اور مسٹر مودی کو فون کرکے مبارکباد اور نیک تمناؤں کا اظہار کیا۔ انہوں نے کہا کہ مسٹر مودی کے ساتھ ان کی بات چیت اچھی رہی۔ انہوں نے دعویٰ کیا کہ ہندوستان کی روس سے تیل کی خریداری اور تجارتی مسائل پر بھی بات چیت ہوئی۔
امریکی صدر کے ساتھ بات چیت کے بعد، مسٹر مودی نے بدھ کو سوشل میڈیا پر کہا کہ انہوں نے ہندوستان-امریکہ شراکت داری کی پائیدار طاقت پر زور دیا اور دہشت گردی سے نمٹنے اور بین الاقوامی تعاون کو فروغ دینے کے لئے ہندوستان کے غیر متزلزل عزم کو دہرایا۔
