نئی دہلی: مرکزی وزارت داخلہ نے لال قلعہ دھماکہ کیس کی تحقیقات قومی تحقیقاتی ایجنسی (این آئی اے) کو سونپ دی ہے۔ اس سے پہلے دہلی پولیس کا اسپیشل سیل اس معاملے کی تحقیقات کر رہا تھا۔
یہ فیصلہ منگل کو مرکزی وزیر داخلہ امت شاہ کی رہائش گاہ پر منعقدہ ایک اعلیٰ سطحی جائزہ میٹنگ میں کیا گیا۔ پیر کی شام لال قلعہ کے قریب ایک طاقتور کار بم دھماکے میں دس افراد ہلاک اور بیس کے قریب زخمی ہو گئے۔
میٹنگ میں مرکزی داخلہ سکریٹری، انٹیلی جنس بیورو کے ڈائریکٹر، دہلی پولیس کمشنر اور این آئی اے کے ڈائریکٹر جنرل سمیت کئی سینئر افسران نے شرکت کی۔ جموں و کشمیر کے ڈائریکٹر جنرل ویڈیو کانفرنس کے ذریعے میٹنگ میں شامل ہوئے۔
ذرائع نے بتایا کہ میٹنگ میں تحقیقات این آئی اے کو سونپنے کا فیصلہ کیا گیا۔ مسٹر شاہ نے لوک نائک جے پرکاش اسپتال میں زخمیوں سے ملنے کے بعد پیر کی شام دھماکے کی جگہ کا دورہ کیا۔ انہوں نے کہا تھا کہ وہ منگل کی صبح ایک میٹنگ میں صورتحال کا جائزہ لیں گے۔
