نئی دہلی: قومی تحقیقاتی ایجنسی (این آئی اے) نے ممنوعہ دہشت گرد تنظیم لشکر طیبہ سے منسلک 2023 کے بنگلورو جیل کیس میں ایک اسسٹنٹ سب انسپکٹر اور ایک ڈاکٹر سمیت تین مزید ملزمان کے خلاف ضمنی چارج شیٹ داخل کی ہے، حکام نے جمعہ کو بتایا۔
چارج شیٹ میں ایک خاتون، انیس فاطمہ، اسسٹنٹ سب انسپکٹر چن پاشا اے، اور ماہر نفسیات ڈاکٹر ناگراج ایس کو بطور ملزم شامل کیا گیا ہے۔ ان پر تعزیرات ہند، یو اے پی اے، دھماکہ خیز مواد ایکٹ، اور بدعنوانی کی روک تھام ایکٹ کی مختلف دفعات کے تحت الزام عائد کیا گیا ہے۔ این آئی اے نے اکتوبر 2023 میں مقامی پولیس سے کیس کی تفتیش اپنے ہاتھ میں لے لی تھی۔ مفرور جنید احمد سمیت نو ملزمان کے خلاف پہلے ہی چارج شیٹ داخل کی جاچکی ہے۔
