۔
ممبئی: اداکارہ کاجل اگروال اور اداکار شریاس تلپڑے نے اپنی آنے والی فلم ’دی انڈیا اسٹوری‘ کی ریلیز سے قبل ایک خصوصی ویڈیو پیغام جاری کیا ہے جس میں ملک میں خوراک میں ملاوٹ کے سنگین مسئلے کی طرف توجہ مبذول کرائی گئی ہے۔ زی اسٹوڈیوز اور ایم آئی جی پروڈکشنز اینڈ اسٹوڈیوز کے اشتراک سے تیار کی گئی اس فلم کو چیتن ڈی کے نے ڈائریکٹ کیا ہے اور ساگر بی شندے نے لکھا اور پروڈیوس کیا ہے۔
حال ہی میں جاری ہونے والی ایک ویڈیو میں، کاجل اگروال اور شریاس تلپڑے نے سامعین سے فلم دیکھنے کی اپیل کرتے ہوئے کہا کہ "دی انڈیا اسٹوری" صرف تفریح تک محدود نہیں ہے بلکہ ایک ایسے سماجی مسئلے کو اجاگر کرتی ہے جو لاکھوں لوگوں کی صحت کو متاثر کر رہی ہے۔ فلم میں خوراک میں ملاوٹ کے چھپے ہوئے خطرات کو اجاگر کیا گیا ہے اور اس کے بارے میں بیداری پیدا کرنے کی کوشش کی گئی ہے۔ انہوں نے کہا کہ یہ مسئلہ صرف سماج کے ایک طبقے تک محدود نہیں ہے بلکہ ہر ہندوستانی کی زندگی اور صحت سے متعلق ہے۔
