نئی دہلی: سپریم کورٹ نے الیکشن کمیشن کو ہدایت دی ہے کہ وہ آل انڈیا ترنمول کانگریس کے نام اور نشان پر تنازعہ چار ماہ کے اندر حل کرے۔
عدالت نے دونوں فریقین کو چار ہفتوں میں کمیشن کے سامنے اپنے حلف نامے اور جوابی حلف نامے داخل کرنے کی ہدایت کی اور واضح کیا کہ اس معاملے میں دلائل مقررہ وقت کے اندر مکمل ہونے چاہئیں۔ چیف جسٹس سوریہ کانت، جسٹس جویمالیہ باغچی اور وی موہنا پر مشتمل بنچ نے محترمہ ممتا بنرجی کی طرف سے دائر درخواست پر سماعت کرتے ہوئے یہ ہدایت جاری کی، جس میں ترنمول کے نام اور اس کے 'پھول اور گھاس' کے نشان کو منجمد کرنے کے الیکشن کمیشن کے عبوری فیصلے کو چیلنج کیا گیا تھا۔
عدالت کا یہ حکم الیکشن کمیشن کے اس استدلال کے بعد آیا کہ انتخابی نشان کے تنازعات جس میں حلف ناموں کی ایک بڑی تعداد شامل ہے، وقت طلب ہے۔ بنچ نے اس عمل کو تیز کرنے کے لیے مصنوعی ذہانت (AI) کے استعمال کا مشورہ دیا۔ الیکشن کمیشن نے پارٹی کا اصل نام اور نشان منجمد کر دیا ہے اور عارضی طور پر ممتا آل انڈیا ترنمول کانگریس کا نام اور 'فٹ بال پلیئر' کا نشان محترمہ بنرجی کی قیادت والے دھڑے کو الاٹ کر دیا ہے۔
اروپ رائے دھڑے کو ڈیموکریٹک ترنمول کانگریس کا نام اور 'لفافہ' نشان دیا گیا ہے۔ سینئر وکیل کپل سبل اور کلیان بندیوپادھیائے نے بنچ کو مطلع کیا کہ ممتا بنرجی کے دھڑے نے جولائی میں ہی اپنا جواب داخل کیا تھا، جب کہ مخالف دھڑے نے ابھی تک اپنا جواب داخل نہیں کیا ہے۔
