کانگریس کی انتخابات ہارنے کے بعد مینڈیٹ کی توہین کی ایک طویل تاریخ ہے: شیوراج
نئی دہلی، مرکزی زراعت اور کسانوں کی بہبود کے وزیر شیوراج سنگھ چوہان نے ’’ایک شہری، ایک ووٹ‘‘ کو منصفانہ انتخابات کی بنیاد بتاتے ہوئے کہا کہ کانگریس کی انتخابات ہارنے کے بعد مینڈیٹ کی توہین کی ایک طویل تاریخ ہے۔
اتوار کو سوشل میڈیا پلیٹ فارم X پر جاری کردہ ایک بیان میں، مسٹر چوہان نے ووٹر لسٹوں کے اسپیشل انٹینسیو ریویژن (SIR) میں بے ضابطگیوں کے معاملے پر الیکشن کمیشن پر تنقید کرنے اور چیف الیکشن کمشنر گیانیش کمار کے استعفیٰ کا مطالبہ کرنے پر کانگریس صدر ملکارجن کھرگے کو نشانہ بنایا۔ انہوں نے کہا، "کانگریس کے پاس ہارنے کے بعد مینڈیٹ کی توہین کی ایک طویل تاریخ ہے۔ الیکشن کمیشن کو بدنام کرنا اور آئینی اداروں کو کمزور کرنا کانگریس کے ڈی این اے میں ہے۔"
انہوں نے کہا کہ اگر کانگریس الیکشن جیتتی ہے تو الیکشن کمیشن اچھا ہے، لیکن اگر ہار جائے تو الیکشن کمیشن برا ہے۔ انہوں نے سوال کیا کہ کانگریس نے کرناٹک، تلنگانہ اور ہماچل پردیش میں انتخابات کیسے جیتے؟ انہوں نے کانگریس کے بیلٹ پیپر کے مطالبے پر سوال اٹھاتے ہوئے کہا کہ اس مطالبے کے ذریعے کانگریس ملک کو 80 اور 90 کی دہائی میں واپس لے جانا چاہتی ہے۔ انہوں نے کہا، "اب وہ بیلٹ پیپر کے ذریعے انتخابات کرانے کی بات کر رہے ہیں۔ 1980 اور 1990 کی دہائیوں کو یاد کریں، جب بیلٹ بکس لوٹے گئے تھے۔ ایک ہی شخص بیلٹ پیپر پر مہر لگاتا تھا۔ کیا کانگریس ملک کو اس دور میں واپس لے جانا چاہتی ہے؟"
انہوں نے کہا کہ ٹیکنالوجی نے انتخابات میں شفافیت لائی تو کانگریس اس کی مخالفت کیوں کرنا چاہتی ہے؟ انہوں نے کہا کہ کانگریس پہلے ہی ملک میں ایمرجنسی نافذ کرکے جمہوریت کو کمزور کرچکی ہے اور اب آئینی اداروں کو کمزور کرنے کا خطرناک کھیل کھیل رہی ہے۔
مرکزی وزیر زراعت نے کہا کہ ادارے غلط ہیں، نظام غلط ہے، ہر چیز کو تباہ کرنا، اور ملک کو افراتفری میں ڈالنا گناہ ہے، اور کانگریس یہ گناہ کرنے پر تلی ہوئی ہے، لیکن کانگریس کے ناپاک عزائم اور منصوبے کبھی کامیاب نہیں ہوں گے۔ انہوں نے کہا، "ایک شہری، ایک ووٹ منصفانہ انتخابات کی بنیاد ہے۔ ووٹر لسٹ کی مکمل نظر ثانی سے انتخابات میں شفافیت بڑھتی ہے اور عوام کا اعتماد بڑھتا ہے۔"
انہوں نے لوک سبھا میں اپوزیشن لیڈر راہل گاندھی اور مسٹر کھرگے پر حملہ کرتے ہوئے کہا کہ مسٹر گاندھی کے کہنے پر مسٹر کھرگے نے وزیر اعظم اور وزیر داخلہ کو "ناجائز" کہا۔ یہ جمہوریت اور عوام کے مینڈیٹ کی توہین ہے۔ یہ آئینی اداروں کو کمزور کرتا ہے، جمہوریت میں عدم اعتماد پیدا کرتا ہے، اور پورے ملک میں انتشار پھیلانے کی کوشش کرتا ہے۔ کانگریس کس طرح کی بیان بازی کر رہی ہے؟
