بیجاپور: چھتیس گڑھ کے بیجاپور میں کریگٹہ پہاڑی پر جاری 'نکسلی مٹاؤ آپریشن' کے سولہویں دن بدھ کو، سیکورٹی فورسز نے ایک بڑی کامیابی حاصل کی جب انہوں نے ایک انکاؤنٹر میں 20 سے 22 نکسلیوں کو مارنے کا دعویٰ کیا۔ ان میں سے اب تک 18 نکسلیوں کی لاشیں برآمد ہوئی ہیں۔ ڈرون کیمروں سے لی گئی تصاویر میں بھی نکسلیوں کی نقل و حرکت کی تصدیق ہو رہی ہے۔ چھتیس گڑھ میں نکسلیوں کے آخری گڑھ کریگٹہ کی پہاڑیوں پر جمع ہونے والے نکسلیوں کو سیکورٹی فورسز نے گھیر لیا ہے۔ سنٹرل ریزرو پولیس فورس (سی آر پی ایف) کے ڈائریکٹر جنرل (ڈی جی) گیانیندر پرتاپ سنگھ بھی دہلی سے اس آپریشن پر نظر رکھے ہوئے ہیں۔ اس کے علاوہ چھتیس گڑھ کے ایڈیشنل ڈائریکٹر جنرل آف پولیس (ADG) (نکسل آپریشنز) وویکانند سنہا، سی آر پی ایف کے انسپکٹر جنرل (آئی جی) راکیش اگروال اور بستر کے آئی جی پی سندرراج بھی انکاؤنٹر کی نگرانی کر رہے ہیں۔ امید ہے کہ شام تک فوجی تاریخی کامیابی کی طرف بڑھ سکتے ہیں۔
