ملک میں کورونا کے ایکٹو کیسز کم ہو کر 6483 ہو گئے، گزشتہ 24 گھنٹوں کے دوران مزید 4 مریض انتقال کر گئے
نئی دہلی، ملک میں گزشتہ 24 گھنٹوں میں 353 فعال کورونا کیسز کی کمی کے بعد فعال کیسز کی کل تعداد کم ہو کر 6483 ہو گئی ہے۔ ساتھ ہی اس عرصے میں مزید چار مریضوں کی موت سے مرنے والوں کی تعداد بڑھ کر 113 ہو گئی ہے۔
گزشتہ 24 گھنٹوں کے دوران 1173 مریض صحت یاب ہونے کے بعد اس وائرس سے نجات پانے والوں کی مجموعی تعداد 15945 ہوگئی ہے۔
غور طلب ہے کہ 22 مئی کو ملک میں کورونا کے صرف 257 ایکٹیو کیسز تھے۔
مرکزی وزارت صحت اور خاندانی بہبود کی طرف سے آج جاری کردہ اعداد و شمار کے مطابق، گزشتہ 24 گھنٹوں کے دوران چار مزید کورونا سے متاثرہ مریضوں کی موت ہوئی ہے۔
مہاراشٹر میں کورونا انفیکشن سے دو اور مریضوں کی موت کے ساتھ ہی وہاں اموات کی تعداد 31 تک پہنچ گئی ہے اور قومی دارالحکومت اور کیرالہ میں ایک ایک مریض کی موت کے ساتھ ہی اموات کی تعداد بالترتیب 13 اور 36 تک پہنچ گئی ہے۔ اس عرصے کے دوران جہاں 12 ریاستوں اور مرکز کے زیر انتظام علاقوں میں کورونا کیسز میں اضافہ دیکھا گیا، وہیں 10 ریاستوں میں فعال کیسز میں کمی دیکھی گئی۔ جبکہ دیگر ریاستوں اور مرکز کے زیر انتظام علاقوں سے کورونا انفیکشن کا کوئی کیس موصول نہیں ہوا ہے۔ محکمہ صحت کے حکام کے مطابق، انفیکشن نئی ابھرتی ہوئی اقسام، خاص طور پر LF.7، XFG، JN.1 اور حال ہی میں شناخت کی گئی NB.1.8.1 ذیلی اقسام کی وجہ سے ہو رہا ہے۔ یہ متغیرات زیر تفتیش ہیں۔ وزارت کے اعداد و شمار کے مطابق، گزشتہ 24 گھنٹوں کے دوران 32 ریاستوں اور مرکز کے زیر انتظام علاقوں میں سے 22 میں فعال کورونا کیسز میں اضافہ اور کمی کے کیسز سامنے آئے ہیں، جب کہ تین ریاستوں میزورم، ہماچل پردیش اور اروناچل پردیش میں کورونا انفیکشن کا کوئی فعال کیس نہیں ہے۔
