نئی دہلی، عام آدمی پارٹی (آپ) کے رہنما آتشی نے کہا ہے کہ گزشتہ 10 سالوں میں مرکزی تفتیشی ایجنسیوں نے ان کی پارٹی کے رہنماؤں کے خلاف 200 سے زیادہ جھوٹے مقدمے درج کیے ہیں لیکن ایک روپیہ بھی برآمد نہیں ہوا۔
محترمہ آتشی کا ردعمل اس وقت آیا جب دہلی کے سابق نائب وزیر اعلیٰ منیش سسودیا آج انسداد بدعنوانی برانچ (اے سی بی) کے سامنے اسکولوں میں کلاس رومز کی تعمیر سے متعلق مبینہ بدعنوانی کے معاملے میں پوچھ گچھ کے لیے پیش ہوئے۔
انہوں نے کہا کہ پچھلے 10 سالوں میں ای ڈی، سی بی آئی، محکمہ انکم ٹیکس اور دہلی پولیس نے آپ لیڈروں کے خلاف 200 سے زیادہ جھوٹے مقدمات درج کیے ہیں، لیکن آج تک ایک روپیہ بھی برآمد نہیں کیا گیا۔
اے اے پی لیڈر نے بی جے پی پر الزام لگایا کہ وہ دہلی میں اپنی ناکامیوں کو چھپانے کے لیے ہٹ دھرمی کی حکمت عملی اپنا رہی ہے۔ انہوں نے کہا کہ پوری دہلی میں بجلی کی طویل کٹوتی ہے، گھروں میں پانی کی کمی ہے اور سڑکیں پانی میں ڈوبی ہوئی ہیں۔ لیکن بی جے پی ان مسائل کو حل کرنے کے بجائے عوام کو گمراہ کرنے کے لیے فرضی مقدمات چلانے میں مصروف ہے۔
انہوں نے کہا کہ دہلی کے لوگ پچھتا رہے ہیں کہ انہوں نے بی جے پی کو ووٹ کیوں دیا۔
