آئیووا (یو ایس اے) ہندوستانی نوجوان بیڈمنٹن کھلاڑی آیوش شیٹی اور تنوی شرما نے یو ایس اوپن 2025 میں تاریخی کارکردگی کا مظاہرہ کرتے ہوئے مردوں اور خواتین کے سنگلز زمرے کے فائنل میں جگہ بنالی۔
ہفتہ کی رات ایک گھنٹہ اور سات منٹ تک جاری رہنے والے اس میچ میں عالمی بیڈمنٹن رینکنگ میں 34 ویں نمبر پر موجود 20 سالہ آیوش شیٹی نے سیمی فائنل میں ٹاپ سیڈ اور عالمی نمبر 9 چائنیز تائپے کے چو ٹیئن چن کو 21-23، 21-15، 21-14 سے شکست دی۔ آیوش نے پہلی بار BWF ورلڈ ٹور فائنل میں جگہ بنائی ہے۔ ٹائٹل میچ میں ان کا مقابلہ کینیڈا کے تھرڈ سیڈ برائن یانگ سے ہوگا۔
خواتین کے زمرے میں 16 سالہ تنوی شرما نے سیمی فائنل میں یوکرین کی ساتویں سیڈ پولینا بوہرووا کو 21-14، 21-16 سے شکست دے کر خواتین کے سنگلز فائنل میں جگہ بنالی۔ اس جیت کے ساتھ تنوی بی ڈبلیو ایف ورلڈ ٹور فائنل میں پہنچنے والی سب سے کم عمر ہندوستانی کھلاڑی بن گئی ہیں۔ فائنل میں تنوی کا مقابلہ امریکہ کی ٹاپ سیڈ 34 سالہ بیوین ژانگ سے ہوگا۔
