نئی دہلی، سپریم کورٹ نے منگل کو مرکزی حکومت اور تمام ریاستی حکومتوں کو نوٹس جاری کرتے ہوئے ان سے اس سوال پر اپنا موقف پیش کرنے کو کہا ہے کہ "کیا عدالتیں ریاستی اسمبلیوں سے منظور شدہ بلوں پر غور کرتے ہوئے صدر اور گورنروں کے لیے وقت کی حدیں اور طریقہ کار طے کر سکتی ہیں؟"
اس سلسلے میں صدر دروپدی مرمو نے سپریم کورٹ سے 13 مئی کو اپنی رائے دینے کو کہا تھا اور اس میں 14 سوالات اٹھائے تھے۔
چیف جسٹس بی آر گاوائی اور جسٹس سوریا کانت، جسٹس وکرم ناتھ، جسٹس پی ایس نرسمہا اور جسٹس اتل ایس چندورکر کی آئینی بنچ نے صدر کے معاملے پر سپریم کورٹ سے رائے طلب کی اور اس پر غور کرنے پر رضامندی ظاہر کی۔
پانچ رکنی آئینی بنچ نے اس معاملے میں مرکز اور تمام ریاستی حکومتوں کو نوٹس جاری کیا اور اٹارنی جنرل آر وینکٹرامانی سے بھی کہا کہ وہ اس معاملے میں عدالت کی مدد کریں۔ بنچ نے اس معاملے میں اگلی سماعت کے لیے 29 جولائی کی تاریخ مقرر کی ہے۔ بنچ نے یہ بھی کہا کہ اگست کے وسط سے متعلقہ فریقین کے دلائل سنے جائیں گے۔
غور طلب ہے کہ سپریم کورٹ نے 8 اپریل کو اپنے فیصلے میں تمام گورنروں کے لیے اسمبلی سے منظور شدہ بل کو منظور کرنے کی آخری تاریخ مقرر کی تھی۔ فیصلے میں کہا گیا کہ آئین کے آرٹیکل 200 کے تحت کسی بل کے حوالے سے گورنر کے پاس کوئی صوابدید نہیں ہے اور وہ وزراء کی کونسل کے مشورے پر کام کرتے ہیں۔ ایسی صورت حال میں اسے وزراء کی کونسل کے مشورے پر لازماً عمل کرنا پڑے گا۔ عدالت نے فیصلے میں کہا تھا کہ اگر صدر گورنر کے ذریعہ بھیجے گئے کسی بل کو اپنی منظوری نہیں دیتے ہیں تو ریاستی حکومتیں اپنا معاملہ براہ راست سپریم کورٹ میں رکھ سکتی ہیں۔
صدر دروپدی مرمو نے آئین کے آرٹیکل 143 (1) کے تحت دیئے گئے اختیارات کا استعمال کرتے ہوئے ایک ریفرنس کے ذریعے سپریم کورٹ سے رائے مانگی ہے۔ آئین کا آرٹیکل 143 (1) صدر کے سپریم کورٹ سے رائے طلب کرنے سے متعلق ہے۔ بیرندر، جتیندر
