نئی دہلی، الیکشن کمیشن نے کہا ہے کہ پیر کی سہ پہر تین بجے تک بہار میں نئی ووٹر لسٹ کے مسودے میں ناموں کو حذف کرنے یا شامل کرنے کے حوالے سے کسی بھی سیاسی جماعت کی طرف سے کوئی دعویٰ یا اعتراض موصول نہیں ہوا ہے، لیکن تین دنوں میں ووٹرز کی جانب سے 1900 سے زیادہ دعوے اور اعتراضات درج کیے گئے ہیں۔ کمیشن نے آج ایک ریلیز میں کہا کہ یکم اگست کی سہ پہر 3 بجے (جس وقت مسودہ کو عام کیا گیا تھا) سے 4 اگست کی سہ پہر 3 بجے تک سیاسی جماعتوں کی جانب سے ایک بھی دعویٰ یا اعتراض درج نہیں کیا گیا ہے۔ اس مدت کے دوران، ریاست بھر میں رائے دہندوں سے مسودے میں ناموں کے اضافے اور ناموں کو غیر قانونی طور پر حذف کرنے سے متعلق 1,927 دعوے اور اعتراضات موصول ہوئے ہیں۔
