مدھوبنی: وزیر اعظم نریندر مودی نے جموں و کشمیر کے پہلگام میں ہوئے دہشت گردانہ حملے کو ہندوستان کی روح پر حملہ قرار دیتے ہوئے اور ملک کی 140 کروڑ آبادی کی قوت ارادی سے گرجتے ہوئے کہا کہ اب دہشت گردوں کا صفایا کرنے کا وقت آگیا ہے اور دہشت گردوں اور سازش کرنے والوں کو ایسی سزا ملے گی جو ان کے تصور سے بھی بڑی ہو گی۔
مسٹر مودی نے جمعرات کو یہاں جھانجھر پور کے لوہانہ پنچایت میں پنچایتی راج کے یوم تاسیس کے موقع پر منعقدہ ایک اجتماع میں 13,480 کروڑ روپے سے زیادہ کے پروجیکٹوں کا افتتاح اور سنگ بنیاد رکھنے کے بعد اپنے خطاب میں کہا، "یہ حملہ صرف غیر مسلح سیاحوں پر نہیں ہے۔ ملک کے دشمنوں نے ہندوستان کی روح پر حملہ کرنے کی جرات کی ہے۔"
وزیر اعظم نے کہا کہ میں واضح الفاظ میں کہنا چاہتا ہوں کہ جن دہشت گردوں نے یہ حملہ کیا اور جنہوں نے اس حملے کی سازش کی انہیں اس سے بڑی سزا ملے گی جس کا وہ تصور بھی نہیں کر سکتے تھے۔ اب دہشت گردوں کے باقی ماندہ گراؤنڈ کو تباہ کرنے کا وقت آ گیا ہے۔ 140 کروڑ ہندوستانیوں کی قوت ارادی اب دہشت گردی کے آقاوں کی کمر توڑ دے گی۔
بہار کی سرزمین سے شری مودی نے دہشت گردی کے خلاف ہندوستان کے پختہ عزم کا اعادہ کرتے ہوئے پوری دنیا کو ایک مضبوط پیغام دیا اور واضح الفاظ میں کہا، "ہندوستان ملک کے امن و سلامتی کو چیلنج کرنے والے ہر دہشت گرد اور اس کے سرپرستوں کی شناخت، سراغ لگائے گا اور سزا دے گا۔ ہندوستان دہشت گردوں کا زمین کے آخری کونے تک پیچھا کرے گا اور انصاف کو یقینی بنانے کی ہر ممکن کوشش کرے گا۔"
