نئی دہلی، کانگریس نے کہا ہے کہ دنیا میں ہندوستان کی شبیہ ایک غیرجانبدار ملک کی رہی ہے، اس لیے پوری دنیا نے ہماری اہمیت کو تسلیم کیا ہے اور جب بھی کوئی چیلنج آیا، پوری دنیا اس کے حل کے لیے ہندوستان کی طرف دیکھتی رہی، لیکن اب اس صورت حال میں ٹوٹ پھوٹ ہے اور عالمی سطح پر ہمارا اثر و رسوخ کم ہورہا ہے اور یہ انتہائی تشویشناک بات ہے۔
کانگریس کے سینئر لیڈر آنند شرما نے جمعرات کو یہاں پارٹی کے نئے ہیڈکوارٹر اندرا بھون میں ایک پریس کانفرنس میں کہا کہ آج اقوام متحدہ بھی کمزور ہوتا جا رہا ہے اور اس کے فیصلوں کو بھی نافذ نہیں کیا جا رہا ہے۔ یہ ایک بڑا چیلنج بن گیا ہے اور بھارت ایسے چیلنجز کو بہتر بنانے میں اہم کردار ادا کر سکتا ہے، لیکن اس کے لیے ہمیں اپنے امیج کو پہلے کی سطح پر لانا ہو گا اور خارجہ پالیسی میں وسیع تبدیلیاں لانا ہوں گی تاکہ کسی بھی ملک کے دباؤ میں آئے بغیر اپنے مفادات کو اہمیت دیتے ہوئے متوازن فیصلے کیے جائیں۔ ہمیں ہر سطح پر ہوشیار رہنا ہوگا اور کسی بھی ملکی، متعصب یا سیاسی ایجنڈے کو آگے نہیں بڑھانا ہوگا اور ایسا کرنا نہ صرف ایک غلطی ہوگی بلکہ بہت بڑی غلطی ہوگی۔
